चंदगड/प्रतिनिधी : चंदगड नगरपंचायत निवडणुकीच्या तोंडावर राजकीय वातावरण तापले असून आज दुपारी हिंडाल्को मैदानावर होणारी मुख्यमंत्री देवेंद्र फडणवीस यांची जाहीर सभा या तापलेल्या वातावरणात आणखी ठिणगी टाकणारी ठरणार आहे. राज्यातील वरिष्ठ नेतृत्वाचा दौरा, स्थानिक पातळीवरील ध्रुवीकरण आणि राष्ट्रवादींची अनपेक्षित एकी यामुळे चंदगडमध्ये सध्या ‘राजकीय भूकंप’ झाल्याची चर्चा रंगत आहे.
गत काही आठवड्यांपासून चंदगड तालुक्यात दोन्ही राष्ट्रवादी काँग्रेस गट एकत्र येण्याचे संकेत मिळत होते. अखेर हे दोन्ही गट एकत्र उभे ठाकल्याने चंदगड पॅटर्नचा धुमाकूळ संपूर्ण राज्यभरात चर्चेचा विषय ठरला. भाजप-शिंदे गटाचा पराभव करण्यासाठी राष्ट्रवादींची एकी ही स्थानिक पातळीवरील राजकारणात मोठा टर्निंग पॉइंट मानली जात आहे. या घडामोडीनंतर महायुतीसमोरील समीकरण बदलले असून, मुख्यमंत्री फडणवीस आजच्या सभेत यावर काय भाष्य करतात, हे ऐकण्यासाठी सर्वांचे कान टवकारले आहेत.
दरम्यान, या निवडणुकीत आमदार शिवाजी पाटील यांची प्रतिष्ठा पणाला लागली असून, भाजप शिंदे चे सुनील कानेकर यांच्यावर नगराध्यक्षपदाची धुरा सोपवत त्यांना उमेदवारी दिली आहे. कानेकर यांच्या सभोवताली भाजप, शिंदे गट आणि स्थानिक नेत्यांनी एकत्रितपणे मोर्चेबांधणी सुरू केली आहे. मात्र राष्ट्रवादींच्या एकीमुळे काणेकर यांना अडचणींचा सामना करावा लागणार आहे.
चंदगड नगरपंचायत निवडणूक ही विकास आणि राजकीय ताकद यांच्यातील सरळ सामना ठरणार आहे. राष्ट्रवादींच्या संयुक्त उमेदवारीमुळे चंदगडमध्ये निर्माण झालेला राजकीय कलाटणीचा फटका भाजप शिंदे शिवसेनेला बसू नये यासाठी मुख्यमंत्री फडणवीस कोणते विकास मुद्दे पुढे आणतात, कोणती आश्वासने देतात, याचा स्थानिक पातळीवर मोठा परिणाम होणार आहे.
आजची सभा ही फक्त प्रचारसभा नसून भाजप शिंदे शिवसेने बाजूंच्या कार्यकर्त्यांची मानसिकता, आत्मविश्वास आणि रणनिती ठरवणारी ‘निर्णायक सभा’ ठरेल, अशी चर्चा जिल्हाभर सुरू आहे. फडणवीस यांचे भाषण राष्ट्रवादींच्या एकीला थेट उत्तर देणार का, की विकासाच्या मुद्द्यांवर महायुतीचे वर्चस्व स्थापित करण्याचा प्रयत्न केला जाणार?
हे स्पष्ट होण्याकडे चंदगडचे राजकीय वातावरण आतुरतेने पाहत आहे.
Post a Comment
0 Comments