चंदगड विधानसभेच्या विकासासाठी मुख्यमंत्री देवेंद्र फडणवीस म्हणजे ‘कोरा बेरर चेक’

चंदगड/प्रतिनिधी : चंदगड विधानसभेचा शाश्वत विकास करण्यासाठी मुख्यमंत्री देवेंद्र फडणवीस हे आमदार शिवाजीराव पाटील यांच्यासाठी अक्षरशः कोरा बेरर चेक असल्याचे चित्र आज चंदगडच्या भव्य जाहीर सभेत स्पष्ट झाले. नगरपंचायत, जिल्हा परिषद आणि पंचायत समिती निवडणुकांच्या प्रचारादरम्यान मुख्यमंत्री फडणवीस यांनी चंदगडसाठी हवा तितका निधी उपलब्ध करून देण्याचा ठाम विश्वास व्यक्त करताना, चंदगडच्या विकासाला कुठेही आर्थिक मर्यादा अडथळा ठरणार नसल्याचे स्पष्ट केले.

गोवा आणि कर्नाटक सीमेजवळ वसलेले चंदगड हे महाराष्ट्राचे प्रवेशद्वार असल्याने या भागाचा सर्वांगीण विकास करणे ही राज्य सरकारची जबाबदारी असल्याचे सांगून फडणवीस म्हणाले की चंदगडमध्ये स्वतंत्र उपजिल्हाधिकारी कार्यालय उभारणे, चंदगडमधून शक्तिपीठ महामार्ग नेऊन तरुणांना मोठ्या प्रमाणात रोजगाराची संधी निर्माण करणे आणि ग्रामीण भागातील सर्व प्रलंबित प्रश्न सोडवण्यासाठी आवश्यक तेवढा निधी देण्यात येईल. चंदगड, गडहिंग्लज आणि आजरा नगरपंचायतींसाठी भाजपच्या उमेदवारांना विजय मिळवून द्यावा, विकास निधी मिळवण्यासाठी मी सदैव उभा आहे, असे आवाहन त्यांनी केले.

महाबळेश्वर आणि माथेरानपेक्षा चंदगडची निसर्गसंपन्नता अधिक असल्याचे सांगून येथील पर्यटन क्षेत्राला सरकारी पातळीवर विशेष चालना देण्यात येणार असल्याचे त्यांनी नमूद केले. लाडकी बहीण योजना जोपर्यंत आपण मुख्यमंत्री आहोत तोपर्यंत बंद होणार नाही, तसेच हेरे सरंजामी प्रश्न मार्गी लावून 50 गावांतील शेतकऱ्यांना दिलासा देण्याचे आश्वासनही त्यांनी दिले.

या सभेत आमदार शिवाजीराव पाटील म्हणाले की चंदगड नगरपंचायतीसाठी 193 कोटींचा निधी मिळवण्यात आपण यशस्वी झालो आहोत. चंदगडच्या तरुणांसाठी रोजगारनिर्मिती, आयुष्यमान आरोग्य सेवा, मेडिकल कॉलेज, इंजिनिअरिंग कॉलेज व क्रीडा संकुल उभारण्याचे प्रयत्न सुरू असून मुख्यमंत्री फडणवीस यांच्या पाठबळाने हे सर्व प्रकल्प लवकरच प्रत्यक्षात उतरतील, असा विश्वास त्यांनी व्यक्त केला.

खासदार धनंजय महाडिक यांनी आपल्या मनोगतात सांगितले की देशातील 80 कोटी जनतेला मोफत अन्न, 10 कोटींना शौचालय, 12 कोटींना मोफत गॅस, 2 कोटी 42 लाख लाभार्थ्यांना लाडकी बहीण योजना—भाजप सरकारने कुठेही जातीयता पाहिली नाही, भ्रष्टाचार केला नाही. विकास हेच ध्येय ठेवून काम करणाऱ्या या स्वच्छ सरकारच्या पाठीशी जनतेने ठाम राहावे, असे आवाहन त्यांनी केले.

या कार्यक्रमाला चंद्रकांत पाटील, प्रकाश आवाडे, संजय घाडगे, माजी राज्यमंत्री भरमू पाटील, विनायक उर्फ अप्पी पाटील, अमरसिंह घाडगे, मेघाराणी जाधव, आमदार अमल महाडिक, तसेच आजरा, गडहिंग्लज आणि चंदगड नगरपंचायतींचे उमेदवार अशोक चराटी, गंगाधर व्हस्कोटी आणि सुनील काणेकर आदी मान्यवर मोठ्या प्रमाणावर उपस्थित होते. प्रास्ताविक दिग्विजय देसाई यांनी केले.