राजगोळी खुर्द येथे अपघातात वृद्धाचा मृत्यू.

 

चंदगड (प्रतिनिधी) : चंदगड तालुक्यातील राजगोळी खुर्द येथील शाळेसमोर शुक्रवारी दुपारी झालेल्या भीषण अपघातात दुचाकीवरील एक वृद्ध जागीच ठार झाला, तर दोन जण गंभीर जखमी झाले. पेट्रोल-डिझेल वाहतूक करणाऱ्या टँकरने बेपर्वाईने दिलेल्या धडकेत हा अपघात झाला असून परिसरात हळहळ व्यक्त होत आहे.

मृताचे नाव मारुती बाबू पाटील (वय ६७, रा. चिंचणे) असे आहे. तर जखमींमध्ये विष्णू ढुंडाप्पा तरवाळ (वय ५५) व सागर मसाप्पा सुतार (वय ३४, दोघेही रा. चिंचणे) यांचा समावेश आहे. तिघेही काही कामानिमित्त राजगोळी खुर्द येथे आले होते. काम आटोपून गावी परतत असताना शाळेसमोर पेट्रोल-डिझेल वाहतूक करणाऱ्या टँकरने त्यांच्या दुचाकीला जोरदार धडक दिली.

धडकेत दुचाकीवर मागे बसलेले मारुती पाटील रस्त्यावर फेकले गेले व टँकरच्या चाकाखाली आल्याने त्यांचा जागीच मृत्यू झाला. चालक सागर सुतार व विष्णू तरवाळ हे रस्त्यावर पडून गंभीर जखमी झाले. विष्णू तरवाळ यांच्या डोक्याला गंभीर इजा झाल्याने त्यांच्यावर बेळगाव येथील खासगी रुग्णालयात उपचार सुरू आहेत.मारुती पाटील यांच्या पश्चात पत्नी, दोन मुलगे, मुलगी, सुना व नातवंडे असा मोठा परिवार आहे. कुटुंबातील आधारस्तंभ हरपल्याने चिंचणे गावात शोककळा पसरली आहे.

गावकऱ्यांनी व्यक्त केलेल्या भावना हृदयस्पर्शी होत्या. शाळेसमोर झालेल्या या अपघातामुळे पालक व ग्रामस्थांमध्ये संताप पसरला आहे. “गावात वर्दळीच्या ठिकाणी मोठमोठे टँकर वेगाने धावताना दिसतात. अशा निष्काळजी वाहनचालकांवर कडक कारवाई व्हायला हवी. प्रशासनाने शाळेसमोर स्पीडब्रेकर्स, सीसीटीव्ही व वाहतूक नियंत्रणाची पावले उचलली पाहिजेत,” अशी मागणी स्थानिकांनी केली.

या घटनेतून पुन्हा एकदा स्पष्ट झाले की, निष्काळजीपणे चालवलेली वाहनं किती निर्दोष जीव घेतात. रस्त्यावर सुरक्षितता पाळणे, नियमांचे पालन करणे आणि सार्वजनिक ठिकाणी विशेष खबरदारी घेणे ही प्रत्येक वाहनचालकाची जबाबदारी आहे. अन्यथा अशा अपघातांत निष्पापांचा जीव जात राहील.