(इतर केडरला देता येणारे बीएलओचे काम शिक्षकांवर टाकल्याने नाराजी,तरीही सामाजिक बांधिलकी जपत शिक्षकांचा सहभाग)
प्रशासनाशी थेट चर्चा : समन्वय समितीचे सदानंद पाटील यांनी तहसीलदार व विभागीय प्रतिनिधी निहाल मुल्ला यांच्याकडे शिक्षकांच्या तक्रारी ठामपणे मांडल्या.
मानधनाबाबत महत्त्वाची घोषणा : ऑगस्ट 2025 पर्यंत जुनी मानधन पद्धत आणि सप्टेंबर 2025 पासून नवीन नियमानुसार मानधन अदा होणार-अशी प्रशासनाची स्पष्ट माहिती.
चंदगड तालुका :चंदगड नगरपंचायतीच्या आगामी निवडणुकांची प्रक्रिया सुरू असताना शिक्षकांवर टाकण्यात आलेल्या बीएलओ कामांच्या वाढत्या भाराबाबत समन्वय समितीच्या वतीने सदानंद पाटील यांनी प्रशासनासमोर शिक्षकांच्या व्यथा ठामपणे मांडल्या. अनेक जिल्हा परिषद व पंचायत समित्यांमध्ये बीएलओची जबाबदारी इतर केडरला देण्यात आली असूनही चंदगड क्षेत्रात ही कामे मोठ्या प्रमाणावर शिक्षकांकडेच सोपविण्यात आली आहेत. शिक्षणाचे मूळ काम सांभाळत असताना ही वाढीव जबाबदारी पेलणे कठीण जात असूनही सामाजिक बांधिलकीतून व लोकशाही प्रक्रियेला सहकार्य म्हणून शिक्षकांनी ही कामे निभावली आहेत.
या तक्रारींसंदर्भात तहसीलदारांसोबत प्राथमिक चर्चा झाल्यानंतर संबंधित विभागाचे प्रतिनिधी निहाल मुल्ला यांच्यासमोरही मुद्देसूद मागण्या ठेवण्यात आल्या. विशेषतः वाढीव मानधन, कामाचा अन्याय्य बोजा, तसेच नगरपंचायत निवडणुकीसाठी देण्यात आलेल्या आदेशांचा पुनर्विचार करण्याचा प्रश्न समितीने ठामपणे उपस्थित केला.
प्रशासनाच्या प्रतिसादात, तहसीलदार यांच्या मार्गदर्शनाखाली महसूल विभाग योग्य व सकारात्मक चर्चेच्या दिशेने काम करत असल्याचे सांगण्यात आले. बीएलओंच्या मानधनाबाबत महत्त्वपूर्ण माहिती देताना निहाल मुल्ला यांनी स्पष्ट केले की, “ऑगस्ट 2025 पर्यंत जुनी मानधन प्रणाली लागू राहील; तर सप्टेंबर 2025 पासून नवीन नियमानुसार मानधन अदा केले जाईल.” सर्व शिक्षक बीएलओंना याबाबत अधिकृत सूचना वेळेत मिळतील, असेही त्यांनी नमूद केले.शिक्षकांच्या मागण्यांना प्रशासन सकारात्मक प्रतिसाद देत असल्याचे संकेत मिळत असून पुढील काही दिवसांत या संदर्भातील अंतिम निर्णय महत्त्वाचा ठरणार आहे.
Post a Comment
0 Comments