ढोलगरवाडी–कीटवाड रस्त्याच्या दुरुस्तीला अखेर प्रारंभ; प्रवाशांना दिलासा

 

(स्वाभिमानी शेतकरी संघटनेच्या रस्ता रोको इशाऱ्यानंतर विभागाचे लेखी आश्वासन पूर्ण,3 वर्षांपासून रखडलेला रस्ता;कामाच्या दुरुस्तीला सुरुवात)

चंदगड/प्रतिनिधी : ढोलगरवाडी–कीटवाड रस्त्याची गेल्या अनेक वर्षांपासून झाली असलेली दुरवस्था आणि प्रवाशांचे हाल अखेर लक्षात घेऊन आजपासून रस्ता दुरुस्तीच्या कामाला सुरुवात करण्यात आली आहे. त्यामुळे नागरिकांनी मोठा दिलासा व्यक्त केला आहे.

सदर रस्ता देशमुख अँड कंपनी यांनी 2000 साली तब्बल 10 कोटी 9 लाख रुपये खर्चून पूर्ण केला होता. तसंच, पुढील पाच वर्षांच्या देखभाल-दुरुस्तीसाठी 54 लाख रुपये खर्चाची तरतूदही होती. मात्र, शासनाकडून चार वर्षांचे पैसे न मिळाल्याचे कारण सांगत कंपनीकडून दुरुस्ती कामाला सातत्याने टाळाटाळ केली जात होती. परिणामी रस्ता पूर्णतः खड्डेमय होऊन प्रवास अत्यंत असुरक्षित झाला होता.

या गंभीर परिस्थितीबाबत स्वाभिमानी शेतकरी संघटनेचे जिल्हा उपाध्यक्ष प्रा. दीपक पाटील यांनी आक्रमक भूमिका घेत 16 ऑक्टोबर रोजी ढोलगरवाडी येथे रस्ता रोको आंदोलनाचा इशारा दिला होता. त्यांच्या या इशाऱ्यानंतर महाराष्ट्र ग्रामीण रस्ते विकास महामंडळाने तातडीने बैठक घेऊन पावसाळा संपताच दुरुस्ती काम सुरू करण्याचे लेखी आश्वासन दिले होते.

या आश्वासनाची पूर्तता करत आजपासून रस्ता दुरुस्तीची कामे प्रत्यक्षात सुरू करण्यात आली. त्यामुळे ढोलगरवाडी, कीटवाड, परिसरातील प्रवासी, ग्रामीण रुग्णवाहिका सेवा, तसेच शेतकरी वर्गामध्ये आनंद आणि समाधान व्यक्त होत आहे.स्थानिक नागरिकांचे म्हणणे आहे की, "हा रस्ता सुरू झाल्यास शिक्षण, आरोग्य, बाजारपेठ, रुग्णवाहिकांच्या हालचालींना मोठी गती मिळेल. अनेक वर्षांपासून हा प्रश्न प्रलंबित होता, आज काम सुरू झाल्याने नक्कीच दिलासा मिळाला."

प्रा. दीपक पाटील यांनी सांगितले की, “ही केवळ सुरुवात आहे; गुणवत्तापूर्ण काम झालेच पाहिजे. गरज भासल्यास पुन्हा आंदोलन करू.”ढोलगरवाडी–कीटवाड मार्गावरील नागरिकांचे दीर्घकाळ प्रलंबित स्वप्न अखेर पूर्ण होण्याच्या मार्गावर आहे.