मुख्यमंत्री देवेंद्र फडणवीस रविवारी चंदगड दौऱ्यावर-निवडणुकीच्या पार्श्वभूमीवर जनतेशी संवाद

विकासकामांवर बोला,उपमा देऊ नका-आमदार शिवाजीराव पाटील यांचा माजी आमदार राजेश पाटील यांना टोला

चंदगड/प्रतिनिधी : चंदगड तालुक्यातील ऐतिहासिक नरसिंह मंदिराच्या दर्शनासाठी पूर्वी आले असताना “पुन्हा येईन” असा दिलेला शब्द पूर्ण करण्यासाठी मुख्यमंत्री देवेंद्र फडणवीस रविवारी चंदगड दौऱ्यावर येत आहेत. आगामी नगरपंचायत, पंचायत समिती आणि जिल्हा परिषद निवडणुकीच्या पार्श्वभूमीवर ते जनतेशी थेट संवाद साधणार असून, राज्य सरकारने केलेल्या विकासकामांचा आढावा जनतेपुढे ठेवणार आहेत.

दरम्यान, मुख्यमंत्री येत असल्याने राजकीय वातावरण चांगलेच तापले आहे. विरोधकांकडे मुद्दे नसल्यामुळे वेगवेगळी कारणे देऊन फडणवीस यांच्या दौऱ्यावर टीका सुरू असल्याचा आरोप BJP–शिंदे गटाने केला आहे. चंदगड येथे आयोजित पत्रकार परिषदेमध्ये आज बोलताना आमदार शिवाजीराव पाटील यांनी माजी आमदार राजेश पाटील यांच्यावर टीकास्त्र सोडले.

“माजी आमदार आणि नंदाताई बाभुळकर यांच्या काळात सत्ता असूनही चंदगडमध्ये अपेक्षित विकास साधता आला नाही. उलट गेल्या काही वर्षांत मी केलेल्या 193 कोटींच्या कामांमुळे तालुक्याचा चेहरा बदलला आहे,” असे ते म्हणाले.तसेच माजी आमदारांच्या ‘वाघ’ उपमेवर प्रत्युत्तर देताना ते म्हणाले, “उपमा देण्यात वेळ घालवू नका, विकासकामांवर बोला.”राजू शेट्टी यांनी निर्माण केलेल्या गैरसमजावर प्रतिक्रिया देताना शिवाजीराव पाटील म्हणाले,“मी शेतकऱ्यांच्या विरोधात नाही. तालुक्यातील सर्व साखर कारखान्यांनी शेतकऱ्यांच्या उसाला 3410 रुपयांची पहिली उचल आणि हंगामानंतर 100 रुपयांची भर — असे एकूण 3510 रुपये देण्यास मान्य केले आहे.”

पुढील पाच वर्षांत चंदगड नगरीला 1000 कोटींपेक्षा जास्त निधी मिळवून देण्याचे आश्वासन देत त्यांनी तरुणांसाठी रोजगारनिर्मिती, सुसज्ज आरोग्यसेवा, आधुनिक शैक्षणिक सुविधा आणि जातीय सलोखा यावर काम करण्याची ग्वाही दिली.

माजी जिल्हा परिषद सदस्य सचिन बल्लाळ यांनी गंभीर आरोप करत सांगितले की,“प्रत्येक घरातील तरुणाला चंदगड बँकेत नोकरी मिळेल अशा खोट्या आश्वासनांचा सपाटा काही लोकांनी लावला आहे. जनतेने अशा दिशाभूल करणाऱ्या आश्वासनांना बळी पडू नये.”भाजप–शिवसेना (शिंदे गट) पाठीशी ठाम राहण्याचे आवाहन त्यांनी केले.

मराठा समाजाचे तालुकाध्यक्ष सुरेश सातवणेकर यांनी सर्व समाजांसाठी समान व सर्वांगीण विकासाचे अभिवचन दिले.या पत्रकार परिषदेला माजी सभापती शांताराम पाटील, नगराध्यक्ष पदाचे उमेदवार सुनील कानेकर, लक्ष्मण गावडे, रवींद्र बांदिवडेकर, डॉ. परसराम पाटील, अनिल शिवनगेकर, विशाल बल्लाळ यांसह सर्व नगरसेवक पदाचे उमेदवार उपस्थित होते.