भारतीय संविधान बहुजनांच्या अस्तित्वाचा श्वास-शरीफ सय्यद

(बहुजन क्रांती सामाजिक संघटनेकडून संविधान दिन उत्साहात साजरा)

चंदगड : बहुजन क्रांती सामाजिक संघटनेच्या वतीने संविधान दिन मोठ्या उत्साहात आणि भव्यतेने साजरा करण्यात आला.कार्यक्रमाला चंदगडचे सामाजिक कार्यकर्ते शरीफभाई सय्यद प्रमुख पाहुणे म्हणून उपस्थित होते. त्यांच्या प्रभावी उपस्थितीने आणि विचारप्रवर्तक भाषणाने संपूर्ण कार्यकर्ते जागरूकतेने भारावून गेले.अध्यक्षस्थानी संघटनेचे संस्थापक अध्यक्ष व प्रमुख मार्गदर्शक प्रा. डॉ. गुंडूराव कांबळे होते.

आपल्या थरारक आणि आत्मविश्र्वासाने परिपूर्ण भाषणात शरीफ सय्यद म्हणाले की, “भारतीय संविधान हे बहुजन समाजाचे संरक्षण कवच आहे. ही फक्त कायद्यांची पुस्तकबद्ध मांडणी नसून, बहुजनांच्या हक्कांचा श्वास, स्वाभिमानाची ग्वाही आणि सामाजिक न्यायाचा सर्वोच्च आधार आहे.” देशात आजही असमानता आणि भेदभावाचे सावट दिसत असताना संविधानाच्या मूल्यांवर ठाम राहणे ही काळाची गरज असल्याचे त्यांनी सांगितले. शिक्षण, जागरूकता आणि संघटित शक्ती हीच बहुजन समाजाची खरी ताकद आहे, असा ठाम संदेश त्यांनी दिला.

या कार्यक्रमाच्या अध्यक्षीय भाषणात प्रा. डॉ. गुंडूराव कांबळे यांनी संविधान दिनाचे महत्त्व अधोरेखित करत, “हक्कांसोबतच कर्तव्यांची जाणीव ठेवली तरच समाजातील परिवर्तनाची चळवळ अधिक सक्षम होईल. संविधान ही आपल्या अस्तित्वाची ओळख असून त्या मूल्यांचे पालन करणे हे प्रत्येक नागरिकाचे कर्तव्य आहे,” असे प्रतिपादन केले.

यावेळी कार्यक्रमाची सुरुवात संघटनेचे पदाधिकारी आबू उर्फ गोविंद सुतार यांच्या प्रभावी प्रास्ताविकाने झाली. त्यांनी संघटनेच्या वाटचालीबाबत, सामाजिक उपक्रमांबाबत आणि संघटनेने उभ्या केलेल्या चळवळीबाबत सविस्तर माहिती दिली. त्यानंतर बहुजन संघटनचे पी. डी. सरवदे, कार्याध्यक्ष भिकाजीराव भौगोलिकर, सरपंच राजेंद्र कांबळे, आनंत कांबळे, तसेच शाहीर मधुकर कांबळे यांनी मनोगत मांडत संविधानिक विचारांचा प्रसार करण्याची गरज अधोरेखित केली.

कार्यक्रमाचे सूत्रसंचालन अजित शेरशेट्टी यांनी प्रभावीपणे केले. उपस्थित मान्यवरांचे आभार पत्रकार संदीप कांबळे यांनी मानले. कार्यक्रमाला रमेश सुतार, बबन माने शरद लोखंडे अप्पू मांग अमित कांबळे शिवाजी सुतार कलाप्पा कांबळे चंद्रकांत कांबळे महेश कांबळे चंद्रकांत कोदाळीकर, लखन कांबळे, सुधीर कांबळे, हनुमंत कांबळे, संदीप यादव, नागेश कांबळे, अजित कांबळे, सुरज कांबळे यांच्यासह असंख्य पदाधिकारी आणि कार्यकर्ते मोठ्या संख्येने उपस्थित होते.हा कार्यक्रम बहुजन समाजाच्या जागृतीचा आणि संविधानिक मूल्यांच्या अभिमानाचा दिमाखदार प्रदर्शन ठरला.