चंदगड : खेडूत शिक्षण मंडळाचे र. भा. माडखोलकर महाविद्यालय, चंदगड येथील राष्ट्रीय सेवा योजना व समाजशास्त्र विभागाच्या वतीने ‘हर घर तिरंगा’ अभियान तसेच ‘वंदे मातरम्’ गीताच्या १५० वर्षपूर्तीनिमित्त विशेष कार्यक्रमाचे आयोजन उत्साहपूर्ण आणि देशभक्तीमय वातावरणात करण्यात आले. विद्यार्थ्यांमध्ये राष्ट्रप्रेम, राष्ट्रीय एकात्मता, देशभक्तीची भावना तसेच भारतीय स्वातंत्र्यलढ्याच्या गौरवशाली इतिहासाची जाणीव निर्माण करण्याच्या उद्देशाने हा कार्यक्रम आयोजित करण्यात आला.
कार्यक्रमासाठी प्रमुख वक्ते म्हणून प्रा. डॉ. खंडोजीराव काळे, कोवाड महाविद्यालय, चंदगड यांची प्रमुख उपस्थिती होती. आपल्या प्रभावी आणि अभ्यासपूर्ण मार्गदर्शनातून त्यांनी ‘हर घर तिरंगा’ अभियानाचे महत्त्व, राष्ट्रध्वजाचे स्थान, ‘वंदे मातरम्’ गीताचा ऐतिहासिक प्रवास आणि भारतीय स्वातंत्र्यलढ्यात या गीताने निर्माण केलेली राष्ट्रजागृती यावर सविस्तर विवेचन केले.
प्रा. डॉ. खंडोजीराव काळे यांनी आपल्या मनोगतात सांगितले की, राष्ट्रध्वज हा केवळ कापडाचा तुकडा नसून देशाच्या स्वाभिमानाचे, त्यागाचे, शौर्याचे आणि राष्ट्रीय एकात्मतेचे प्रतीक आहे. ‘हर घर तिरंगा’ अभियानाच्या माध्यमातून प्रत्येक नागरिकाच्या मनात देशाबद्दल अभिमान आणि राष्ट्रध्वजाबद्दल आदर निर्माण होणे आवश्यक आहे. तसेच ‘वंदे मातरम्’ हे भारतीयांच्या मनामध्ये स्वातंत्र्याची प्रेरणा आणि राष्ट्रभक्तीची ज्योत प्रज्वलित करणारे ऐतिहासिक गीत असल्याचे त्यांनी स्पष्ट केले. विद्यार्थ्यांनी स्वातंत्र्यसैनिकांच्या त्यागातून प्रेरणा घेऊन देशाच्या विकासासाठी जबाबदार नागरिक म्हणून आपले योगदान द्यावे, असे आवाहन त्यांनी केले.
कार्यक्रमाच्या अध्यक्षस्थानी महाविद्यालयाचे प्रभारी प्राचार्य प्रा. डॉ. एम. एम. माने होते. अध्यक्षीय मनोगतात त्यांनी राष्ट्रभक्ती ही केवळ घोषणांपुरती मर्यादित न राहता ती आपल्या आचरणातून आणि सामाजिक जबाबदारीतून व्यक्त झाली पाहिजे, असे प्रतिपादन केले. विद्यार्थ्यांनी शिक्षणासोबतच सामाजिक बांधिलकी, राष्ट्रीय एकात्मता आणि संविधानिक मूल्ये जोपासावीत, असेही त्यांनी सांगितले.
कार्यक्रमाचे समन्वयक राष्ट्रीय सेवा योजना प्रमुख प्रा. डॉ. शाहू गावडे यांनी प्रास्ताविकातून कार्यक्रमामागील भूमिका आणि उद्देश स्पष्ट केला. ‘हर घर तिरंगा’ अभियानाच्या माध्यमातून राष्ट्रध्वज प्रत्येक घरापर्यंत पोहोचविण्यासोबतच प्रत्येक भारतीयाच्या मनात राष्ट्रप्रेमाची भावना रुजविणे महत्त्वाचे असल्याचे त्यांनी सांगितले. विद्यार्थ्यांनी या अभियानात सक्रिय सहभाग घेऊन समाजामध्ये राष्ट्रीय एकात्मतेचा संदेश पोहोचवावा, असे आवाहन त्यांनी केले.
कार्यक्रमाचे सूत्रसंचालन प्रा. डॉ. ए. डी. कांबळे यांनी अत्यंत प्रभावीपणे केले. त्यांनी कार्यक्रमातील विविध टप्प्यांची माहिती देत उपस्थितांना देशभक्तीच्या भावनेशी जोडून ठेवले. कार्यक्रमाच्या शेवटी प्रा. डॉ. एस. डी. गोरल यांनी उपस्थित मान्यवर, प्राध्यापक, विद्यार्थी, प्रशासकीय कर्मचारी आणि सर्व सहभागींचे आभार मानले.
या कार्यक्रमास महाविद्यालयातील प्रा. एन. के. पाटील, प्रा. डॉ. वाय जाधव, प्रा. एस. एन. पाटील , प्रा. डॉ. ए. पी. पाटील,प्रा. व्ही. के. गावडे , प्रा. डॉ. एस. एस. सावंत, प्रा.वैशाली दानवे , प्रा. डॉ. आर. ए. कमलाकर,पी.पी .धुरी,तुषार लोंढे,अभिजीत कांबळे यांच्यासह महाविद्यालयातील प्राध्यापकवर्ग, राष्ट्रीय सेवा योजनेचे स्वयंसेवक, प्रशासकीय कर्मचारी आणि विद्यार्थी मोठ्या संख्येने उपस्थित होते.
विद्यार्थ्यांच्या उत्स्फूर्त सहभागामुळे संपूर्ण कार्यक्रमाला देशभक्ती, राष्ट्रप्रेम आणि राष्ट्रीय एकात्मतेचे वातावरण प्राप्त झाले. ‘हर घर तिरंगा’ आणि ‘वंदे मातरम्’च्या माध्यमातून देशाच्या स्वातंत्र्यासाठी बलिदान देणाऱ्या स्वातंत्र्यसैनिकांचे स्मरण करण्यात आले. राष्ट्रध्वजाचा सन्मान करणे, देशाच्या अखंडतेचे रक्षण करणे आणि समाजामध्ये बंधुभाव निर्माण करणे ही प्रत्येक नागरिकाची जबाबदारी असल्याचा संदेश या कार्यक्रमातून देण्यात आला.
‘हर घर तिरंगा’ आणि ‘वंदे मातरम्’च्या १५० वर्षपूर्तीनिमित्त आयोजित हा कार्यक्रम विद्यार्थ्यांच्या मनात राष्ट्रप्रेमाची भावना अधिक दृढ करणारा आणि राष्ट्रीय एकात्मतेचा संदेश देणारा ठरला. उत्साहपूर्ण आणि प्रेरणादायी वातावरणात कार्यक्रमाची सांगता झाली.
Post a Comment
0 Comments