चंदगडच्या दोन इसमांकडून बिबट्याचे कातडे जप्त.

अमोल कांबळे/चंदगड प्रतिनिधी : शिकार केलेल्या बिबट्याची कातडी तपोवन मैदान परिसरात विक्रीसाठी आलेल्या चंदगडमधील दोघांना शुक्रवारी (दि. १४ मार्च रोजी) अटक केली.स्थानिक गुन्हे अन्वेषण शाखेच्या (एलसीबी) पथकाने सापळा रचून ही कारवाई केली आहे.

पोलीस अधीक्षक कोल्हापूर यांच्या सूचनेनुसार वन्यजीव प्राणी तस्करीचे अनुषंगाने माहिती काढून प्रभावीपणे कारवाई करण्याबाबत स्थानिक गुन्हे अन्वेषण शाखेचे पोलीस निरीक्षक रविंद्र कळमकर यांनी कोल्हापूर स्थानिक गुन्हे अन्वेषण पोलीस अधिकारी व अंमलदार यांचे पथक तयार करुन त्यांना सुचना व मार्गदर्शन करून  वन्यजीव प्राणी तस्करीची माहिती घेत असताना स्थानिक गुन्हे अन्वेषण शाखेचे पोलीस अंमलदार योगेश गोसावी यांना मिळालेल्या गोपनीय माहितीनुसार चंदगड येथे बिबट्याची शिकार करून त्याचे कातडे विक्री करिता दोन इसम तपोवन मैदान,कोल्हापूर येथे सी.डी. डीलक्स मोटर सायकल वरून येणार असल्याची खात्रीशीर बातमी मिळाली होती. त्या अनुषंगाने स्थानिक गुन्हे अन्वेषण शाखेकडील पथकाने सदर ठिकाणी जाऊन सापळा लावला असता दोन इसम सी.डी. डिलक्स मोटर सायकलवरून कळंबा रोडने तपोवन मैदान येथे आले. त्यांचे गाडीवर एक प्लॅस्टिक पोते होते. तपास पथकाने  छापा टाकून पकडले असता प्रथम दर्शनी उडवा उडवीची उत्तरे देणाऱ्या बाबु सखाराम डोईफोडे, वय ५७ वर्षे, रा. बांदराई धनगरवाडा, तिलारी नगर, ता. चंदगड,  व धाकलू बाळु शिंदे, वय ६५ वर्षे, रा. रोहीदास गल्ली, हेरे, ता. चंदगड,जिल्हा कोल्हापूर या दोन इसमांच्या ताब्यातील प्लॅस्टिक पोत्याची वनविभागाचे अधिकारी व दोन पंचासमक्ष पाहणी केली असता त्यामध्ये बिबट्याचे कातडे मिळून आले.सदरबाबत कायदेशीर प्रक्रिया करून त्यांचे कब्जातून विक्रीकरिता आणलेले अमुल्य किंमतीचे बिबट्याचे कातडे, ४०,०००/- रूपये किंमतीची मोटर सायकल व १०,०००/- रूपये किंमतीचे ०२ मोबाईल हॅन्डसेट असा एकूण ५०,०००/- रूपयेचा माल जप्त करणेत आला आहे. 

राजवाडा पोलीस ठाणेस वन्यजीव संरक्षण अधिनियम कायद्या अंतर्गत गुन्हा दाखल करून सदर इसमांना अटक करण्यात आली आहे.सदरची कामगिरी पोलीस अधीक्षक महेंद्र पंडित यांचे मार्गदर्शनाखाली स्थानिक गुन्हे अन्वेषण शाखेचे पोलीस निरीक्षक रविंद्र कळमकर,सहा. पोलीस निरीक्षक चेतन मसुटगे, पोलीस अंमलदार योगेश गोसावी, वैभव पाटील, गजानन गुरव, महेंद्र कोरवी, अरविंद पाटील, परशुराम गुजरे, संतोष बरगे, प्रविण पाटील, प्रदिप पाटील, विशाल खराडे, शिवानंद मठपती, यशवंत कुंभार व वन विभागाचे अधिकारी राजेंद्र उलपे, प्रमोद पाटील, रणजित पाटील यांनी केली आहे.