चंदगड/प्रतिनिधी : मराठी भाषा साहित्य व लोककला संवर्धन जतन संस्था, चंदगड यांच्या वतीने वाचन प्रेरणा दिनानिमित्त विशेष व्याख्यानाचे आयोजन चंदगड येथे मोठ्या उत्साहात पार पडले. कार्यक्रमाच्या अध्यक्षस्थानी संस्थेचे अध्यक्ष पी. डी. सरवदे होते, तर प्रमुख वक्ते म्हणून चंदगड येथील र.भा. माडखोलकर महाविद्यालयाच्या मराठी विभागाचे प्रा. डॉ. गुंडुराव कांबळे उपस्थित होते.या कार्यक्रमात वाचनाचे महत्त्व, लोककलेचे जतन आणि समाजातील संस्कारांचा पाया बळकट करण्यावर भर देण्यात आला. वाचन ही केवळ सवय नसून ती समाज परिवर्तनाची प्रेरणा आहे, या संदेशाने कार्यक्रमाची दिशा ठरली.
प्रमुख वक्ते प्रा. डॉ. गुंडुराव कांबळे यांनी आपल्या प्रभावी भाषणात सांगितले की, वाचन म्हणजे विचारांना दिशा देणारी सृजनशील प्रक्रिया आहे. वाचक माणूस नेहमी जागरूक, संवेदनशील आणि विचारशील असतो. पुस्तक वाचताना आपण लेखकाच्या अनुभवांशी, भावनांशी आणि विचारांशी एकरूप होतो. मोबाईल आणि सोशल मीडियाच्या युगात माणूस माहिती तर घेतो पण विचार करायला विसरतो; त्यामुळे वाचन ही आत्मविकासाची आणि मानसिक शिस्तीची खरी गुरुकिल्ली आहे. वाचनातून माणूस केवळ ज्ञानच मिळवत नाही, तर त्याच्यात आत्मविश्वास आणि सहानुभूती निर्माण होते. वाचन ही समाज सशक्त बनवणारी सर्वात मोठी शक्ती आहे. समाज, साहित्य आणि लोककलेचे नाते वाचनातूनच दृढ होते. लोककला ही आपल्या संस्कृतीची जिवंत अभिव्यक्ती आहे, आणि तिचे जतन करायचे असेल तर वाचन संस्कृती जपणे अत्यावश्यक आहे, असेही त्यांनी सांगितले.
या कार्यक्रमाचे प्रास्ताविक संस्थेचे सचिव एकनाथ बांदिवडेकर यांनी केले. त्यांनी संस्थेच्या कार्याचा आढावा घेत सांगितले की, संस्था गेल्या अनेक वर्षांपासून मराठी भाषा, साहित्य आणि लोककलेच्या संवर्धनासाठी कार्यरत आहे. वाचन प्रेरणा दिन साजरा करण्यामागचा हेतू म्हणजे नव्या पिढीत वाचनाविषयी प्रेम निर्माण करणे आणि त्यातून समाजात विचारशीलतेचे वातावरण निर्माण करणे हा आहे.
अध्यक्ष पी. डी. सरवदे यांनी आपल्या मनोगतात सांगितले की, संस्था समाजात वाचन संस्कृती रुजविण्यासाठी सातत्याने प्रयत्न करत आहे. आजच्या डिजिटल युगात लोक पुस्तकांपासून दूर जात असले तरी वाचनातूनच माणसाच्या विचारांची परिपक्वता आणि संवेदनशीलता वाढते. वाचन ही केवळ माहिती मिळवण्याची गोष्ट नसून जीवनाला दिशा देणारी साधना आहे. समाजातील प्रबोधन आणि संवर्धनाचे खरे माध्यम म्हणजे पुस्तक, असेही त्यांनी नमूद केले.
कार्यक्रमात जिल्हास्तरीय उत्कृष्ट ग्रामपंचायत पुरस्कार प्राप्त झाल्याबद्दल सरपंच व संचालक विष्णू गावडे यांचा विशेष सत्कार करण्यात आला. मनोगत व्यक्त करताना गावडे म्हणाले की, हा पुरस्कार ग्रामस्थांच्या एकजुटीचा आणि संस्थेच्या प्रोत्साहनाचा सन्मान आहे. वाचन आणि विचार यांमुळेच गावविकासाची प्रेरणा मिळाली, असे त्यांनी सांगितले. शाहीर मधुकर कांबळे यांनी लोककलेच्या माध्यमातून वाचन संस्कृती वाढवण्याचे महत्त्व अधोरेखित केले. त्यांनी सांगितले की, लोककला ही संस्कृतीचे दर्शन घडवणारी शक्ती आहे, आणि ती वाचनातून अधिक समृद्ध होते. यावेळी महाराष्ट्र शासनाच्या लोककला संवर्धन समितीचे संचालक प्रा. डॉ. दौलत कांबळे यांच्या विशेष सहकार्याने चंदगड तालुक्यातील लोककलांना बळ मिळाले, तसेच चंदगड च्या सोंगी परंपरेला अधिकृतपणे शासन मान्यता मिळून त्यांना शासन दरबारी पोहोचवण्याचे काम केल्याबद्दल डॉ.दौलत कांबळे यांच्या अभिनंदनाचा ठराव करण्यात आला.कार्यक्रमाचे सूत्रसंचालन अशोक गावडे यांनी कुशलतेने केले, तर आभार प्रदर्शन प्रवीण नेसरीकर यांनी मानले.
या कार्यक्रमाला संचालक सुधाकर पाटील, अशोक गडदे, महादेव कांबळे, रामलिंग नाईक, पुंडलिक गावडे, भीमाना मोरे, विजय गावडे, तानाजी गुरव, बाळू पाटील, गंगाराम तराळ यांच्यासह साहित्यप्रेमी, ग्रामस्थ व कार्यकर्ते मोठ्या संख्येने उपस्थित होते.कार्यक्रमाच्या शेवटी संस्थेच्या वतीने चंदगड तालुक्यातील सर्व शाळा व ग्रामपंचायतींमध्ये ‘एक दिवस – एक पुस्तक’ हा वाचन उपक्रम राबविण्याचा संकल्प करण्यात आला. या प्रेरणादायी कार्यक्रमाने उपस्थितांच्या मनात वाचनाची नवी चेतना जागवली.
Post a Comment
0 Comments